3月27，突然又再出血。我心緒不寧，因為剛剛31週，好驚BB會唔會好快要出世。
過咗幾日，到到3月31號凌晨嘅時候，我成晚都瞓得好差，成晚都覺得個下腹隱隱作痛。好似之前生君君嘅時候嗰種痛。我拍醒爸爸，我好驚。朝早嘅時候，一起身，去洗手間，發現成張紙巾都係血。我同爸爸講，似乎出事啦。原本仲諗住去搵尹醫生，直接去Q M。
去到Q M，Diana似乎都仲係好樂觀，佢同我檢查過，宮頸仲未開。CTG做過幾次，間唔中都見到一啲宮縮。可能10分鐘一次但係又唔係好勁，又唔係規律。
下午又再做多次，BB真係非常之活躍啊，佢一做完一輪運動之後，心跳就會去到180下，搞到部機成日響，姑娘就要過嚟熄機。
下午做嘅時候，又唔係太多宮縮可以見到。心裏面都有少少僥倖嘅感覺。
不過都到半夜，宮縮又再嚟。2:15鐘醒咗之後一直瞓唔到。下腹一直隱隱作痛。
咁唯有朝頭早再去做CTG。做完之後，發覺都係好密就會有宮縮。
見咗Diana，佢就同我講，可能考慮一下tocolocis. 落steriod，加宮縮suppressant 。
佢話希望可以捱多兩個禮拜。
我唔知道我可唔可以捱到兩個禮拜，但係至少佢就算要出嚟，都希望佢可以生活得好一啲。
於是4月1號8:00 ，我就打咗第一針steriod，然後送咗去labour ward nil by mouth。
佢哋話要12個鐘後再打多一次steriod ，我最後嗰一針要二十四小時之後先可以完全發揮效用。中間就要加啲抗宮縮藥，免得佢出咗嚟，啲藥有冇發揮晒。
開頭就係俾咗最普通嘅adalate and adalate retard 。不過好快就覺得冇用。10至15分鐘就會痛一次。於是好快我就轉左第二隻，atoxifen。
呢隻藥比之前嗰隻好一啲，但係一個鐘頭可能會有一啲唔規律嘅宮縮。我本來叫咗爸爸買一啲雜誌俾我睇，但到最後都痛到冇晒心機睇。只有間唔中搵吓姑娘吹吓水，感覺好少少。
4月1號，係一個好日子，因為有好多BB出世。所以4月2凌晨時分，姑娘都做得踢晒腳。有陣時我想去廁所，因為我身上面搏住CTG, SaO2 monitoring, blood pressure cuff, drips, 所以我一直係瞓係張床上面㗎。我去廁所，就一定要用個尿盆。姑娘太忙，有陣時我都唔好意思叫佢哋。所以有陣時要等成一個鐘頭先可以有呢個盤。而且，夜晚比較有得多鎮痛，所以唔係好瞓㺫，但又冇人可以同我傾吓計。
半夜嘅經歷話俾我聽，我一定要轉藥啦！Diana巡房，我同佢講，隻藥唔得。咁所以我就用咗終極bricanyl。
其實佢哋都唔係好想開呢一隻藥，因為覺得副作用比較大，不過心跳手震，同埋面紅，fluid retention，impaired glucose control (因為要用D50 drip。）
但係我有一種感覺，如果我唔用強效啲嘅藥，我可能捱唔到落去，佢就會出世。
於是我就話照用！
結果用咗20 unit之後，明顯地改善咗。雖然可能一個鐘頭都會有一次宮縮，但係個程度唔算太嚴重，可以接受。夜晚黑嘅時候，可能都繼續有宮縮嘅情況出現，但係我都總算可以瞓下醒下。有陣時我嘅心跳會過咗120 ，不過都係因為都係有宮縮出現嘅時候。
心裏面同自己講，捱過一晚，聽日8:00 ，就夠12個鐘。將來多八個鐘，咁就藥既發揮就會係最好㗎啦！
我開咗收音機，幫自己嘅情緒放鬆。護士成日講，你嘗試放鬆吓啦，如果唔係就會有宮縮。我心諗，我都想放鬆，不過宮縮似乎同我情緒無關。佢似乎係一個signal，話俾我聽，細佬真係好想出世。
呢一個夜晚，差唔多已經有兩日冇食過嘢啦。原來吊鹽水嘅感覺係咁樣㗎！我一樣會有肚餓嘅感覺，所以都要食胃藥。佢吊鹽水其實都幾多水份，所以我每三個鐘頭要用尿盤去一次廁所。佢哋夜晚都有同我駕手指，血糖去到13度。我都有啲擔心，佢會唔會停藥，不過好彩咩嘢都唔需要做。
之後仲同我抽左幾次血，都係驗下random glucose, RFT
我見到我嘅Na 有少少低，記得Diana講過，呢隻藥有機會導致fluid retention，所以佢哋要睇住我嘅血含氧量。咁我就諗到，我身體嘅鹽分低，應該係我身體嘅水份太多。
不過個數字又唔係低得太緊要，希望佢哋唔需要停藥。
可能血糖有啲高嘅關係，呢一晚，我雖然瞓到多少少，但係都會覺得個口好乾。原來我唔可以飲水，佢哋係可以俾冰我。雖然得三粒好細粒，含住係個口度，嗰種口渴嘅感覺係真係會好啲。
第二日朝頭早，姑娘話我半夜有陣時心跳都去到120幾下，根據佢哋嘅protocol, 一定要減藥。
其實我有啲擔心，因為之前嘅份量，我都間唔中有宮縮，一減，唔知會變成點。
但係都冇辦法，唯有試一試再睇。但係減咗之後真係有啲唔妥。有陣時半個鐘頭就有一次。仲要係強烈嘅感覺。覺得似骨嗰度就嚟要撕開。呢種感覺似曾相識，就係上次君君出世嘅時候，開到七度嘅感覺。
好彩朝頭早開個鉗，發覺宮頸仲未開。咁我就知道我仲有時間。
但係等到Diana 巡訪嘅時候， 我就同佢講，我應該要加藥。咁佢就幫我加少少。
下午嘅時候，開始又多咗宮縮。每次都係去到七度嘅程度。我就同姑娘佢講，如果可以再加嘅，就同我加。距離我目標只剩返五個鐘頭，我一定要捱到過去。姑娘其實唔係太想架，因為怕我心跳負荷唔到。我話，平時做運動都會跳到120下，唔會太辛苦。如果我唔加，我嘅宮縮令到佢真係走咗出嚟，咁就白費晒我嘅努力。最後姑娘就同我加到去30。
我差唔多一兩個鐘，再問佢哋攞ice。我仲同佢哋講，好似嗰啲吸毒嘅人，成日問人攞冰。
間唔中又同阿姑娘吹吓水，六點
我宮縮又再翻返嚟啦。
有陣時痛到我心跳去到124
佢哋一定要同我減藥。不過我諗，細佬應該兩個鐘頭之內出唔到嚟。就算我宮縮令到佢要出嚟都好，應該都藥效去到8:00。咁我就同意減。
減咗藥之後，好彩都唔算太嚴重，半個鐘左右一次宮縮。
8:00，正式停藥。
Diana話如果我過到今晚嘅話，BB應該就唔會咁快出嚟。其實我一直用着最強嘅藥，我都有宮縮，所以我唔信停左藥會有奇蹟。不過諗吓奇蹟都會令人開心嘅。但我亦都心理上已經做咗準備，我亦都同左老公講咗，我覺得細佬會出世。我都唔想佢有個假希望，然之後失望。
停左藥之後嘅第一個鐘，風平浪靜
第二個鐘開始又再有返啲宮縮啦⋯⋯
10:00左右，開始頻密，五至10分鐘會有一次。姑娘話，其實都唔可以唔需要理會，因為未喺規律。但係我覺得，種種徵兆話俾我聽，一啲都唔尋常。我唔覺得如果細佬係唔想出世嘅話，會出現咁頻密嘅假宮縮。呢啲宮縮應該嚟真㗎。
去到11:00，我又再搵姑娘，我同佢哋講我似乎宮縮越嚟越密，越嚟越痛。11:30,我同佢哋講我5分鐘一次，我好肯定呢一次係好規律。佢哋原本好似都唔想理會我呢個問題，叫我唔好成日望住個鐘，搞到緊張然之後有宮縮。咁我唔望住個鐘我點知道佢係咪規律呢….
講真，要生小朋友，佢就會出嚟，唔係因為你緊唔緊張㗎啦。
咁到最後佢哋就叫醫生過嚟見我。醫生12點嚟到。開咗鉗，做完檢查，話我已經開咗六度！
我心諗，我都話痛得唔尋常㗎啦⋯⋯
咁跟住咪準備生囉！
佢哋問我使唔使同老公講，我心諗，夜麻麻，咪鬼嚇佢啦。況且同佢講，佢咪成晚瞓唔着囉。咁我就冇打電話啦。佢哋覺得我好奇怪問咗我幾次。
之後我痛，聞笑氣。佢哋話我吸得唔好，因為聽唔到聲。明明我真係聞到㗎啵。後來個姑娘發現，因為個儀器嘅問題，令到我就算我聞到都聽唔到聲。咁諗，點解唔信下我呢。
呢一晚當值嘅姑娘，似乎冇我之前果一晚嘅咁好相與。頭一個鐘頭，我基本上係一個人喺度痛，聞着小氣，冇人理我㗎。佢哋好多時候都行嚟行去，冇一個姑娘係我身邊。所以有陣時我會嗌出嚟。其實當你痛嘅時候，有個人係你隔離，同你加油鼓勵，感覺係會好啲嘅。我記得想一胎，好多人係我身邊，你間唔中會同我check吓我開到幾多度。等我心裏面覺得有進展，痛都值得。不過今次嘅姑娘唔知係咪太忙呢，走來走去，亦都唔同我check一下。
過咗一個鐘頭左右，終於有啲姑娘停落嚟啦。其中一個同我check過佢話，好似都係開到五度左右咋喎？我心諗仲少咗！佢話因為我用力唔好，下面腫咗！
超級超級唔開心呀！
跟住另一個姑娘嗰一陣又再嚟，佢話開到七度。感覺上好似呢一個可靠啲⋯⋯
咁我就繼續努力！但係嗰種痛，真係令人輾轉反側。我都唔知我係用口淨係用鼻去聞笑氣。
跟住有一個姑娘，上咗年紀嘅過嚟按摩我隻腳。我心裏面諗，終於有一個好嘅姑娘！
嗰個姑娘俾咗好多鼓勵嘅說話我，我真係好想佢繼續留低啊！
我亦都講咗我覺得好驚，我驚我生唔到佢。嗰種痛心撕裂，唔知仲要捱幾耐。
但係又唔知點解，之後開始宮縮係好似一至2分鐘就有一次。痛到我死！
跟住就差唔多去到九度十度。可以拆床。
刷完左冇幾耐，好大力咁Push左幾下。穿咗水。再過一陣一樣野飛出嚟。咁你擺喺我心口， BB喊！
跟住佢哋好快就俾咗兒科醫生。跟住就話佢SaO2 84, 又來一個人話唔係84係94….
我心裏面諗，點解你哋做嘢咁奇怪㗎⋯⋯
跟住，我仲係覺得好痛。原來話我下面自然撕裂咗。我記得上一次，佢哋會同我剪。如果生仔生到下面列咗，個傷口會核突啲㗎嘛。
不過算啦，佢慢慢同我補，補左好多針。我記得上次唔係咁耐㗎。跟住同我講，我之後小便應該會有啲痛，因為有啲整損左…
算啦….
本來半夜生仔就係冇咁好㗎啦。
跟住兒科醫生就帶走左我個仔啦。姑娘要同我開一包藥，增加宮縮。我諗可能因為我之前壓抑左兩日，所以而家要開一包藥，避免我留太多血。開頭真係好似血崩咁，係咁唔停咁流。
冇幾耐兒科醫生再過嚟搵我，同我講細佬嘅嘢。佢話細佬好叻豬，基本上一出世，佢係呼吸到嘅，不過就呼吸得好唔平均，所以俾咗氧氣佢。俾咗氧氣之後就好好啦⋯⋯但係又覺得佢始終靠自己一個呼吸好似好吃力，所以決定同佢用cpap, 上icu
佢話細佬一出世，就眼仔碌碌咁樣幫呢個世界。佢亦都好有反應，同埋好活躍。體重1.8 kg，係非常之好。
佢嘅APGAR 1 min 7, 5 min 9。減一分係呼吸。
跟住我覺得好痛，我就同姑娘講想要止痛藥，可唔可以要tramadol。姑娘話而家唔再開呢一隻，因為對餵人奶唔好。 BB食咗有呢隻藥嘅人奶會有副作用。心諗，頭幾日都冇人奶㗎啦，有幾多會攞到落BB度啊。不過佢哋照開咗兩粒Panadol俾我。佢哋攞藥好慢呀⋯⋯佢哋話冇私家床位，要我去大房。跟住同我檢查嘅時候，話覺得我個肚好脹。咁我就我就話：咁你地覺得係乜嘢嚟啊？佢哋話要搵醫生。醫生檢查完之後摸下，佢問我邊度痛我話成個肚都痛。講真你落咗藥幫我宮縮，我點會唔成個肚都痛⋯⋯不過有啲地方係我啲腸痛。我話，我應該有好多尿仲未痾得出嚟同埋我幾日冇大便啦。我叫咗咁多包藥水，平時三個鐘就要去一次廁所，我生仔咁耐到而家都未屙過，可能會令到我咁。咁醫生又不置可否喎⋯⋯
其實我唔覺得我會有咩暗病，係生完仔先會發現嘅。但係醫生就做咗個決定，叫我繼續nil by mouth, x Ray
跟住我等左好耐，終於同我上房啦。我發覺住大房，真係唔係咁好㗎，因為啲媽媽半夜又要餵奶，又要同姑娘傾吓個情況，真係唔係一個好好休息嘅地方。我好想沖涼啊！仲有我好想去大便啊⋯⋯我31號到而家都未去過！
係我百無聊賴嘅時候，我咪同自己個肚檢查下囉。又真係有啲脹。不過我望落去似空氣多啲。跟住我諗起聞笑氣嘅時候，應該吞左啲落肚。
咁所以我個胃都脹，我條腸應該都脹左。應該仲有一啲屎塞住左。咁我就同姑娘講，可能係咁樣，未必需要照X光。但係姑娘話，醫生已經order左….
都係要去AED嗰度照囉
跟住我同姑娘講，如果有片，俾醫生睇，講埋我嘅睇法，或者可以聽日有得食嘢呢。佢哋話會比實習醫生睇㗎啦喎。過咗兩個鐘左右到朝頭早啦，我問姑娘我係咪食得野啦。姑娘話，實習醫生睇完，話我條腸好多氣不過都要繼續禁食⋯⋯
我心諗，我放咗屁就得㗎啦⋯⋯你比我食呀⋯⋯我好肚餓啊⋯⋯
等巡訪醫生！Diana 救左我！佢見到我，
就同我講，之前嘅醫生係實習，唔係太清楚有陣時生完仔都係會咁。其實我心裏面諗，琴日嗰個on call醫生，都真係靠估個喎⋯⋯ 做咗三年，有乜理由唔問一問，我肚入面嘅係咪氣呢….搞到我要禁食，又要照X光。不過唔緊要啦，最緊要有得食啦
跟住到到下午，我見到私家病房有一間係冇人㗎！我即刻問姑娘，我有冇機會可以轉房。姑娘問我係咪HA1
我話我唔知，我淨係知我係醫生AC，喺頭等房可以唔使俾錢。咁佢哋就幫我轉啦⋯⋯
我過去嘅時候有個姐姐同我講，原來啲間房朝頭早都冇人㗎，唔知點解會俾咗我。我唔理得咁多啦，總之頭等房我嚟啦⋯⋯
真係非常之舒服，有私隱度，有獨立廁所。
我去咗探君君，佢似乎比我想像之中大隻。但係我都睇唔清佢個樣
希望佢快啲可以甩咗條喉，比我見下你個樣呀
不過仔大十八變，就會唔同咗㗎啦
暫時一切所有嘢都好好。佢唔似有感染。
Leave a Reply