Category: Andy

大佬已經越嚟越快， 48秒就搞掂咗 而家玩一個pyramid, 29秒就搞掂咗！

星期四買咗4×4扭計骰，教咗佢一陣，佢大致上已經食得喎 星期六第一次由頭到尾都係自己玩，只係用咗10分26秒 瞓完一覺，星期日朝頭早無端端就變咗六分半鐘。 問準老婆得，上網買埋個pyraminx同megaminx。到時基本上所有要玩既都有齊

君君用咗1分48秒K.O.左！

話說今日同君君講乜嘢叫做「十問九唔知」 我話：即係問十條問題，九條都唔知。咁你明唔明？ 我以為好簡單嘅講法，叫佢重複講番出嚟好簡單，點知就係講唔到🤔 五分鐘後 我：我問你，如果有十條問題，你唔識九條，咁你識幾多條？ 君：一條。咁「十問五唔知」就係唔識五條啦！ 原來文字題要變成數學題先解得明….😑

話說君君我想買一個switch game 君君就要儲錢。爸爸話如果上堂答啱問題，就有一蚊 君君好努力咁樣答問題 爸爸叫君君五個錢幣一行，容易啲數 但係君君硬係要6個一行 爸爸激到彈下彈下 今日夜晚黑瞓覺，君君終於講出點解要咁樣 佢話，要儲錢買遊戲，唔可以買嘢俾媽媽 儲夠八個$6就可以買到captain toad 原來個遊戲要$6美金㗎！ 

今日我問君君，佢第時想娶啲乜嘢類型嘅老婆 佢就話想娶媽咪 我話唔得一定要同自己差唔多年紀 佢就揀咗Chloe 我問佢點解 佢話因為Chloe有同佢一樣嘅玩具，消防車Lego 如果娶佢嘅話，就會有兩套一樣嘅玩具 🤣🤣🤣

今日君君嘅同學媽咪同我哋講，小朋友上interview class，其中一題問題問：如果你去到一個荒島，冇水飲點做。 佢個仔居然識得答可以飲海水，不過要將啲鹽同埋水分開😱 我問君君，佢調返轉頭問我：點解我會去荒島？我點樣去？ 我敷衍佢話你當我搭船去啦。 佢就話：應該要喺部船度裝定啲水🤣🤣🤣

今日同君君沖涼嘅時候，我同佢講，一家人係冇秘密嘅。 跟住君君就話，佢同爸爸都有秘密。咁我就問佢係乜嘢秘密啊 佢就話媽媽生日嗰日爸爸會送禮物俾媽媽。 咁我問佢係有咩禮物呀 佢好似知自己講錯嘢咁 佢話記憶遊戲簿囉 之後夜晚佢同爸爸食飯嘅時候，同爸爸講，我冇講到出嚟啊⋯⋯ 究竟係咩秘密啊⋯⋯