Category: Cindy
-
Rubik’s cube
君君用咗1分48秒K.O.左！
-
嘔心瀝血
話說今日同君君講乜嘢叫做「十問九唔知」 我話：即係問十條問題，九條都唔知。咁你明唔明？ 我以為好簡單嘅講法，叫佢重複講番出嚟好簡單，點知就係講唔到🤔 五分鐘後 我：我問你，如果有十條問題，你唔識九條，咁你識幾多條？ 君：一條。咁「十問五唔知」就係唔識五條啦！ 原來文字題要變成數學題先解得明….😑
-
Solid food, 向後爬，ok
自從五個月大開始食固體 而家越食越好 30 ml purée 吞得好快🤘🏻 呢排手臂腳力更加好，可以向後爬少少，之前都可以左右爬少少 轉身都快咗好多 前日同佢玩，叫佢轉身過嚟 佢居然答我OK，之後轉過嚟
-
八個$6
話說君君我想買一個switch game 君君就要儲錢。爸爸話如果上堂答啱問題，就有一蚊 君君好努力咁樣答問題 爸爸叫君君五個錢幣一行，容易啲數 但係君君硬係要6個一行 爸爸激到彈下彈下 今日夜晚黑瞓覺，君君終於講出點解要咁樣 佢話，要儲錢買遊戲，唔可以買嘢俾媽媽 儲夠八個$6就可以買到captain toad 原來個遊戲要$6美金㗎！ 
-
君君娶老婆
今日我問君君，佢第時想娶啲乜嘢類型嘅老婆 佢就話想娶媽咪 我話唔得一定要同自己差唔多年紀 佢就揀咗Chloe 我問佢點解 佢話因為Chloe有同佢一樣嘅玩具，消防車Lego 如果娶佢嘅話，就會有兩套一樣嘅玩具 🤣🤣🤣
-
Interview question
今日君君嘅同學媽咪同我哋講，小朋友上interview class，其中一題問題問：如果你去到一個荒島，冇水飲點做。 佢個仔居然識得答可以飲海水，不過要將啲鹽同埋水分開😱 我問君君，佢調返轉頭問我：點解我會去荒島？我點樣去？ 我敷衍佢話你當我搭船去啦。 佢就話：應該要喺部船度裝定啲水🤣🤣🤣
-
一家人冇秘密
今日同君君沖涼嘅時候，我同佢講，一家人係冇秘密嘅。 跟住君君就話，佢同爸爸都有秘密。咁我就問佢係乜嘢秘密啊 佢就話媽媽生日嗰日爸爸會送禮物俾媽媽。 咁我問佢係有咩禮物呀 佢好似知自己講錯嘢咁 佢話記憶遊戲簿囉 之後夜晚佢同爸爸食飯嘅時候，同爸爸講，我冇講到出嚟啊⋯⋯ 究竟係咩秘密啊⋯⋯
-
細佬三個月大
話咁快細佬就三個月大啦。佢最近多咗好多同我哋發出一啲聲音，好似想同我哋傾偈。佢又會觀察我哋嘅表情，如果對佢笑，佢又會笑。試過一次佢對住我笑，我問佢做乜笑。佢以為我話佢，立即扁嘴。我對住佢笑，佢又立即笑。 佢而家係一個小肥仔，就嚟要大碼片
-
大佬生日願望
今晚食飯，君君提我哋8月29號係佢嘅生日，想要生日禮物。 爸爸：你想要乜嘢生日禮物？ 君君：我想要記憶遊戲簿。（學校將默書叫做記憶遊戲） 真係奇特🤔
-
兩個半月大
細佬Kwan兩個月左右就已經識得認人 呢幾日會對住文姨姨笑同埋笑出聲 雖然佢成日好扭計，但係佢嘅笑容令到人哋都唔捨得鬧佢