Category: Diary
-
君君娶老婆
今日我問君君，佢第時想娶啲乜嘢類型嘅老婆 佢就話想娶媽咪 我話唔得一定要同自己差唔多年紀 佢就揀咗Chloe 我問佢點解 佢話因為Chloe有同佢一樣嘅玩具，消防車Lego 如果娶佢嘅話，就會有兩套一樣嘅玩具 🤣🤣🤣
-
Interview question
今日君君嘅同學媽咪同我哋講，小朋友上interview class，其中一題問題問：如果你去到一個荒島，冇水飲點做。 佢個仔居然識得答可以飲海水，不過要將啲鹽同埋水分開😱 我問君君，佢調返轉頭問我：點解我會去荒島？我點樣去？ 我敷衍佢話你當我搭船去啦。 佢就話：應該要喺部船度裝定啲水🤣🤣🤣
-
一家人冇秘密
今日同君君沖涼嘅時候，我同佢講，一家人係冇秘密嘅。 跟住君君就話，佢同爸爸都有秘密。咁我就問佢係乜嘢秘密啊 佢就話媽媽生日嗰日爸爸會送禮物俾媽媽。 咁我問佢係有咩禮物呀 佢好似知自己講錯嘢咁 佢話記憶遊戲簿囉 之後夜晚佢同爸爸食飯嘅時候，同爸爸講，我冇講到出嚟啊⋯⋯ 究竟係咩秘密啊⋯⋯
-
細佬三個月大
話咁快細佬就三個月大啦。佢最近多咗好多同我哋發出一啲聲音，好似想同我哋傾偈。佢又會觀察我哋嘅表情，如果對佢笑，佢又會笑。試過一次佢對住我笑，我問佢做乜笑。佢以為我話佢，立即扁嘴。我對住佢笑，佢又立即笑。 佢而家係一個小肥仔，就嚟要大碼片
-
大佬生日願望
今晚食飯，君君提我哋8月29號係佢嘅生日，想要生日禮物。 爸爸：你想要乜嘢生日禮物？ 君君：我想要記憶遊戲簿。（學校將默書叫做記憶遊戲） 真係奇特🤔
-
兩個半月大
細佬Kwan兩個月左右就已經識得認人 呢幾日會對住文姨姨笑同埋笑出聲 雖然佢成日好扭計，但係佢嘅笑容令到人哋都唔捨得鬧佢
-
Hernia
Today we found bb has unbilical hernia Doctor said he also has bilateral hydrocele Risk of inguinal hernia as well 🙁 3.45 kg
-
細佬蝦媽媽
頭先我為細佬飲奶 飲到一半同佢掃風 佢嘔左少少奶出嚟 咁同佢收掃耐啲，佢就捵嚟捵去，唔肯坐又唔肯瞓 又喺度叫 唯有叫爸爸出嚟 爸爸一出到嚟，佢就乖乖地瞓喺佢隻手度，抹大個口。爸爸隊支奶俾佢， 2分鐘飲晒50ml 
-
大佬近期最愛
-
細佬
呢個細佬好鍾意嘈 太多尿會嘈，有popo pat pat唔舒服會嘈，太凍會嘈，肚餓會嘈，冇安全感會嘈 換尿片嘅時候要超級小心，因為佢好鍾意一開了片就poopoo或者wee wee 平時得閒都會玩吓手指，試過食手指同finger cross 都幾鍾意笑 大佬Kwan其實都幾錫細佬君 會幫手換尿片，餵奶嘅時候幫手攞紗巾 沖涼嘅時候幫佢落人奶 有時仲見佢偷偷錫細佬個頭 細佬喊嘅時候佢會摸佢頭叫佢唔好喊 大佬Kwan既然咁乖，我哋最近就係咁買玩具俾佢 有兒童版嘅大富翁啦，飛行棋，一大堆嘅Lego，仲有買咗堆屁屁偵探⋯⋯爸爸就好努力咁樣同佢讀書寫字